O domingo, dia 10 de julho, organizamos um roteiro polas paróquias de Orbazai e Adai. Será o primeiro dentro dumha série de roteiros para conhecer a nossa comarca. Partiremos do monte Segade às 10h00.
O QUE IMOS VER:
PEDRAFITA . Estruturas megalíticas e petroglifos.
Este conjunto arqueológico está situado na paróquia de Adai ao Oeste do concelho de Lugo e próximo à margem esquerda do rio Minho. Os elementos arqueológicos da zona situam-se no monte de Pena do Rei numha parte plana a média altura e que recebe o nome de Pedrafita.
Dos castros desta zona destaca o de Penarrubia, que foi ocupado durante a Primeira Idade de Ferro. Conheceu umha breve escavaçom nos anos setenta, passa por ser um dos asentamentos castrexos mais antigos de Galiza. Corresponderia ao grupo de primeiros ?castrinhos? que inçam as suas raizes na Idade do Bronce já em transiçom à do Ferro (s.VI a.C.). No que respeita aos restos arqueológicos situados no interior da serra da Pena do Rei, foi localizada umha cámara megalítica nas proximidades de Pedra Fita, um tumulo de grande tamanho no cumio da serra, onde se acha o topónimo que da nome ao conjunto da montanha e mais um pequeno recinto cumha muralha e um foso perimetral como única defesa. Esta última estrutura conhece-se como o Castrilhom, está catalogada como castro, mas polas suas condiçons de assentamento, mui pouco apropriadas para a defesa , o seu tamanho reducido e pouca altura apontam noutra direcçom, a um possível uso ritual. Aliás localizam-se dous petroglifos muito semelhantes, com figuras circulares.
Alguns investigadores (Le Roux, Garcia Quintela) apuntam à relaçom que existe entre Pedrafita e Lucus Augusti. A fundaçom da cidade fai referência a "lucus", que significa bosque sagrado, polo que poderia relacionar-se coa proximidade dumha estrutura arqueológica de carácter religioso. Aliás a situaçom de Pedrafita com respeito à cidade , situadas em margens opostas do rio Minho, é a mesma configuraçom geográfica que se deu noutros casos galegos (por exemplo no castro de Sam Cibrao de Las em relaçom co santuario da Ferradura). Dá-se polo tanto um patrom parescido entre a ubicaçom dum area ritual e justo noutra beira do rio um assentamento fortificado de certa importáncia .
VALOR AMBIENTAL
A zona que imos percorrer caracteriza-se pola boa conservaçom , mantendo o bosque autóctone próprio (carvalheiras e soutos) combinado coas zonas de exploraçom agrária. A margem direita do rio Minho prácticamente nom tem novas urbanizaçons e os núcleos de populaçom coincidem cos das paróquias tradicionais dessa zona. (Orbazai, Adai)
AMEAÇAS DE AGRESSONS URBANÍSTICAS NESTA ZONA.
O PXOM que se vem de aprovar no concelho, co apoio de PSOE e PP, projectava sobre esta zona um enlace de autovia que viria unir a nova autovia Lugo-Santiago coa A-6 polo Ceao. Esta infraestrutura afectará de levar-se adiante a toda a margem direita do Minho polas paróquias de Orbazai e Adai e cruzando o rio polas paróquias de Bocamaos e Meilam até unir-se coa A-6.
Diversos colectivos já manifestarom a sua oposiçom a este traçado polos custos ambientais e sociais que suporia. Aliás afirmam que se trata dumha manobra com claros interesses especulativos de transpassar à cidade ao outro lado do rio, trazendo o modelo de urbanizaçons as zonas rurais.
DESCRIPÇOM DA ROTA:
Saida às 10h das mesas do monte Segade . Atravessaremos o monte e depois seguiremos caminhando até o castro de Penarrubia. Desde alí iremos até o monte de Pena do Rei e ao conjunto arqueológico de Pedrafita. Veremos os petroglifos e o Castrilhom. Depois continuaremos até a igreja de Adai. Baixaremos até a ponte onde se atopa a depuradora e faremos a volta pola margem direita do rio.
Para jantar cadaquem levará a sua comida. Confirmar assitência ou mais informaçom envia um mail ou telefona ao 627232479.
